Dili, 27/05/2025 – Sekretaria Estadu Komunikasaun Sosiál (SEKOMS), liuhusi Diresaun Nasionál ba Dezenvolvimentu Média (DNDM), sei desloka ba halo lansamentu rádiu postu administrativu Laclubar iha tempu badak.
Diretór Diresaun Nasionál ba Dezenvolvimentu Média, Manuel de Fátima, Terca Feira ne’e hateten, kona-ba preparasaun iha diresaun DNDM preparadu ona no ekipa sira sei desloka ba Laclubar iha inísiu fulan juñu tinan 2025.
“Preparasaun liu-liu tékniku no programa, daudaun ne’e prontu ona, ekipa tékniku sei desloka ba fatin lansamentu, rádiu Laclubar nian iha semana ne’e, hodi hein, loron fiksu lansamentu nian”, hateten diretór DNDM bainhira halo entrevista ho jornalista DNDM tersa-feira (27/05/2025), iha edifisiu DNDM Kintal-Boot, Díli.
Diretór ne’e mós afirma tan, ekipa diresaun DNDM fó ona formasaun ba estrutura rádiu Laclubar iha loron 16 to’o 20 fulan dezembru tinan 2024 liu-bá.
“Preparasaun ba estrutura rádiu Laclubar liu-liu ba jornalista sira prontu ona, no hetan formasaun sira husi senior jornalista no dirasaun nian”, tenik diretór ne’e.
Diretór DNDM lori SEKOMS nia naran husu nafatin ba komunidade postu administrativu Laclubar, munisípiu Manatuto, atu jere rádiu ne’e ho di’ak no bele fó asesu informasaun ba komunidade sira iha área rurál.
“Husu ba komunidade Laclubar atu utiliza rádiu Idate hanesan meius komunikasaun ida, atu asesu informasaun sira iha areas remota sira”.
Planu ida husi SEKOMS ba rádiu komunidade sira mak, harii tan rádiu komunidade rua mak hanesan, rádiu komunidade Laclubar, munisípiu Manatuto no rádiu fronteira Balibo, munisípiu Bobonaro.
Alén ne’e, tuir planu DNDM, rádiu fronteira Balibo sei halo lansamentu relasiona ho loron komemorasaun Balibo Five, iha fulan oubtubru tinan 2025 mai.
Hafoin Lansamentu Rádiu Postu Laclubar lian idate ho Radiu Fronteira Balibo, rejista ona Radiu komunidade hamutuk 21.
Hakerek testu : Vasco
Editor : Ana
Parabéns bá Laclubar oan sira, finalmente iha ona Rádiu Komunidade rasik.