LAUTEIN 06 Juñu 2025 (TATOLI)—Governu liuhusi Sekretária Estadu Komunikasaun Sosiál (SEKOMS), Expedito Loro Dias Ximenes, halo diálogu komunitáriu ho komunidade Iliomar, ho Tema “Investimentu ba Asesu informasaun no dezemvolvimentu Komunitáriu” ne’ebé hala’o iha suku Kainleu postu admistrativu Iliomar, munisípiu Lautein, sesta se’e.
“Avansu teknolojia halo Komunidade sira konsumu informasaun sai hanesan nesesidade lorloron ne’ebé ema hotu hakarak asesu liu-liu sira ne’ebé uza teknolojia hanesan telefone Android, tanba ne’e IX Governu ne’ebé lideradu husi Primeiru-Ministru Kay Rala Xanana Gusmão, tau importánsia tebes hodi halo investimentu ba dezenvolvimentu setór komunikasaun Sosiál hodi fasilita asesu informasaun ba ema hotu,” dehan Expedito Dias Ximenes.
Governante ne’e hateten IX Governu kontinua tau atensaun, nune’e komunidade bele hetan informasaun husi mídia konvesionál sira no plataforma dijitál sira.
“Iha programa nunu governu tau atensaun makas tebes oinsá mak bele dezenvolve área komunikasaun sosiál, liuliu komunidade sira bele hetan informasaun husi mídia konvensionál hanesan televizaun sira, jornál oi-oin ne’ebé iha no mós rádio nasionál no rádio komunidade sira no mós governu dezenvolve daudaun sentru informasaun suku ne’ebé estabelese ona iha suku balu iha territóriu Timor-Leste”, nia afirma.
Governu liuhusi SEKOMS kontinua halo levantamentu ba sentru informasaun suku 28 ne’ebé estabelesidu ona husi oitavu Governu konstitusionál, nune’e hadi’a fali kondisaun no funsionamentu, nune’e fasilita komunidade sira asesu informasaun liuhusi sentru ne’e.
APA Iliomar preokupa infraestrutura bázika
Iha fatin hanesan, Administradór Postu Administrativu Iliomar elojia ho prezensa governu liu husi SEKOMS hodi koalia direta ho povu liu-liu liga ho dezemvolvimentu informasaun no teknolojia ne’ebe lao dadaun.
“Ohin, Sekretáriu Estadu bele mai lori dezenvolvimentu ki’ik ne’ebé sei akontese mai Iliomar iha komunikasaun nian, ne’e hanesan pasu di’ak ida ba ami nu’údar komunidade Iliomar, iha oportunidade ida ne’e mós hakarak hato’o kona ba asesu telekomunikasaun iha parte tasi susar tebtebes karik bele konsidera mós ida ne’e “ hateten administrador Postu Iliomar Fernando Cardoso de Deus
Enttertantu, Xefe Suku Kainleu, João Adizito da Costa, agradese ba membru Governu nia prezensa iha Postu Administrativu Iliomar hodi halao diálogu hodi rona direta prekupasaun povu nian liu-liu problema báziku sira hanesan Estrada, no sira seluk tan.
“Agradese tebes ba Governu liuhusi Sekretáriu Estadu Komunikasaun Sosial ne’ebé ohin mai iha Iliomar hodi rona direta preokupasaun, ami nian hanesan ohin sekretariu Estadu liu mai haree rasik ami nia estrada ho kondisaun aat tebes iha tempu udan, ami nia estrada ne’e nakfilak ba mota difikulta tebes ami nia movimentu ba mai munisípiu no nasional” hateten xefe Suku Joao Adizito da Costa
Entertantu hatan ba preokupasaun liga ho infraestrutura bázika, Diretór Jerál Abitasaun no Urbanizmu Ministériu Obra Publika, Domingos D. J. Sequeira afirma governu liuhusi Ministériu Obra Publika define ona ba reabilitasaun estrada kapitál Munisípiu sira no sei kontinua ba postu Administrativu sira.
“Ba estrada iha Munisípiu Lautein ita hahú uluk ona husi Lospalos-Villa, nune’e fulan hirak liu ba ita lansa ona no husi Lospalos-Vila liga ba postu Iliomar no Liga ba Uatucarbau iha faze dezeñu no tama ona iha finalizasaun, nune’e sei tama iha proposta orsamentu 2026”, nia afirma.
Aleinde ne’e, Iha ámbitu dialogu ho komunidade Iliomar Sekretáriu Estadu atualiza mós prosesu dezenvolvimentu infraestrutura komunikasaun sosiál nian ne’ebé daudaun ne’e governu planu atu estabelese torre Rádio no Televizaun Timor-Leste (RTTL,E.P) ne’ebé sei instala iha foho Naunil Postu Iliomar munisípiu Lautein.
Entertantu Postu Administativu Iliomar, ho luan 302,17 Km2, kompostu husi suku 6 mak hanesan AilebeEre Kaenleu Fuat Iliomar I, Iliomar II no Tirilolo adeia 25, ho total Populasaun 11.394, kompostu husi mane 56.86 no feto 57.08, no total uma kain 2.338.
Jornalista: Anito Soares
Editór: Florencio Miranda Ximenes
Fonte Notísia: https://tatoli.tl/2025/06/06/sekoms-halo-dialogu-komunitariu-ho-komunidade-iliomar/
