Racol Lian Idate, 17 Outubru 2025, Koordenador Raebia, hamutuk ho Administradór Postu Administrativu Laclubar ho nia ekipa halo lansamentu ba batar fini ba grupu benefisiáriu iha aldeia Wer-Ulun Suku Batara, Postu Administrativu Laclubar, Sexta-Feira iha Suku Batara.
Koordenadór NGO Raebia, Domingos Soares, hateten, Objetivu husi fahe fini ba grupu benefiáriu iha Aldeia Wer-ulun nian ho total benefiáriu hamutuk 30 no kada benefiáriu ida hetan 2,5 kg fahe ba sira atu oinsa bele kuda iha fatin demoplot sira hodi sai nu’udar ezemplu ida hodi fó benefísiu ba sira nia moris no hasa’e kresimentu ekonomia ba sira ninia moris loro-loron nian.
Etapa da-II sei Fahe mós aifarina kain no fehuk kain sira atu nune’e sira bele kuda iha to’os refere atu bele sustenta sira nia nesesidade loro-loron nian, tamba ne’e maka husi parte Raebia ho Jica Timor-Leste apoiu fini sira ne’e ba grupu benefisiáriu sira hodi utuliza fini ne’e no produs rezultadu di’ak, balun sira bele lori ba fa’an, balu mós bele han no bele mós halo buat seluk.
ba future sei apoiu mós aifarina kain, fehuk kain no ai gamal atu oinsa bele tulun grupu benefisiáriu no grupu agrikultura sira oinsa atu konserva rai bokur sira ne’e atu labele tun liu-ba rai tetuk.
Iha fatin hanesan, Xefe Grupu Wer-ulun, José Soares, hateten durante ne’e hosi NGO Raebia apoiu ami liu hosi material tékniku no fini sira ne’e oinsa atu halo mudansa ba to’os ne’ebé mak uluk halo estragus hanesan sunu rai arbiru ho nune’e hetan apoiu ida ne’e ho modelu foun hanesan terras atu bele sustenta moris loro-loron nian.
Xefe Grupu ne’e husu ba NGO Raebia atu apoiu nafatin liu husi buat seluk tamba ida ne’e kapas tebes oinsa bele halo mudandsa ba to’os ida ne’ebé ho modelu foun atu nune’e ba oin labele estraga tan ambiente sira “ami hakarak apoiu mós ami liu husi kuda ai-oan no fini sira seluk husi batar,’’dehan Jose.
Reportagen Ekipa Racol Lian Idate
